அத்தியாயம் 17

“எப்படி நடந்தது இது?” அதீத கோபத்தில் இருந்தாலும் சிறிதும் நிதானம் இழக்காதவர் சீதாராமன்,💬

“ஏதோ செய்து இருக்கிறார்கள் சார். என்னவென்று புரியவில்லை… விசாரித்துக் கொண்டிருக்கிறோம்…” பவ்யமாக அதே நேரத்தில் பயத்தோடு பதிலளித்தார் அவரது செக்ரட்டரி மாதவகிருஷ்ணன்.💬

“இது தகுந்த பதிலில்லை மாதவன். எவ்வளவு பெரிய ரிஸ்க் எடுத்தேன் என்பதை அறியாதவர் அல்ல நீங்கள். ஆனாலும் இப்படியொரு பதில்… எதிர்பார்க்கவில்லை…” அவரது கொக்கிபிடியில் அயர்ந்து நின்றார்.💬

“மன்னிக்க வேண்டும் சார். நடந்தது என்ன என்பதை முழுவதுமாக ஆராய எங்களுக்குச் சிறிது நேரம் தேவைப்படுகிறது.” நேராகப் பதில் கூறினார் மாதவக் கிருஷ்ணன்.💬

இது தான் இவர். எதுவாக இருந்தாலும் நேராகப் பேசிவிடுவார் அதோடு வெட்டு ஒன்று துண்டு இரண்டு என்பது போன்ற அணுகுமுறையாகத்தான் இருக்கும். இவரது நேர்மைக்காகவே சீதாராமன் எவ்வளவு வேண்டுமானாலும் கொட்டி கொடுக்கத் தயாராக இருந்தார்.💬

“எவ்வளவு நேரம்?”💬

“ஒரு நாள்…”💬

“எடுத்துகொள்ளுங்கள் ஆனால் கம்ப்ளீட் அனலிசிஸ் வேண்டும் எனக்கு… நீங்கள் செல்லலாம்…” மாதவக் கிருஷ்ணன் வெளியேறியதை உறுதிப்படுத்திக் கொண்ட சுபர்ணா கையில் இருந்த கண்ணாடி டம்ளரை தூக்கி எறிந்தாள்.💬

அது தூரமாகச் சென்று விழுந்து படீரென்று உடைந்தது. அவள் முகம் ஜிவுஜிவு என்று சிவந்து இருந்தது.💬

“சுபி… உணர்ச்சிவசப்படாதே… அதற்கான நேரமல்ல இது…”💬

“பின் வேறு எதற்கானது? என் கண் முன்னரே பிரகாஷ் அவளுடன் குலவுவதைப் பார்த்த பின்னரும் என்னால் எப்படியப்பா பேசாமல் இருக்க முடியும்?”💬

“இப்போது அதுவல்ல பிரச்சனை. நம்முடைய திட்டங்கள் பாழாகி விட்டன. இதில் நமக்குக் கிட்டதட்ட இருபது கோடி நஷ்டமாகி விட்டிருக்கிறது. அதைப் பார் சுபி.”💬

“அது என்னுடைய டேஷுக்குச் சமானம். என்னுடைய தேவையெல்லாம் என்னிடம் சவால் விட்ட… சத்யப்ரகாஷ்…” இன்னும் என்ன கெட்டவார்த்தையெல்லாம் இவள் வாயிலிருந்து வருமோ என்று ஒரு கணம் மூச்சை இழுத்து பிடித்து விட்டார்.💬

“இவ்வளவு நஷ்டத்தையும் ஏற்றது உனக்காகத்தான் சுபி. என் முன்னரே என் மகளைப் பற்றி எவ்வளவு தரக்குறைவாகப் பேசினான். அதை நான் விட்டுவிடுவேனா?” பதிலுக்குக் கொதித்தார்.💬

“அவன் எனக்கு வேண்டும் டேடி. அவன் கண்டிப்பாக வேண்டும்…” குரலில் இருந்த சைக்கோத்தனமான வெறியை கண்டு ஒரு நிமிடம் சீதாராமனே ஆடிவிட்டார்!💬

“கண்டிப்பாகச் சுபி… அதை நான் நடத்தி காட்டுகிறேன்…” மகளுக்கு ஏற்றத் தந்தையாகச் சூளுரைத்தார்!💬